چھترپتی سمبھاجی نگر (اے بی این نیوز) کاکروچ جنتا پارٹی (سی جے پی) کے بانی ابھجیت دیپکے نے دعویٰ کیا ہے کہ انہیں بھارتیہ جنتا پارٹی (بی جے پی) میں شمولیت کے لیے مبینہ طور پر دباؤ ڈالا گیا اور دھمکی آمیز پیغامات بھی موصول ہوئے۔
پریس کانفرنس سے خطاب کرتے ہوئے ابھجیت دیپکے نے الزام عائد کیا کہ انہیں ایک پیغام کے ذریعے بی جے پی میں شامل ہونے کی پیشکش کی گئی، جس میں کہا گیا کہ اگر وہ پارٹی میں شامل ہو جائیں تو ان اور ان کے خاندان کے لیے حالات بہتر ہوں گے، بصورت دیگر انہیں مشکلات کا سامنا کرنا پڑ سکتا ہے۔
انہوں نے کہا کہ وہ اس معاملے کو عوام کے سامنے لانا ضروری سمجھتے ہیں اور مطالبہ کیا کہ ان الزامات کی شفاف تحقیقات کرائی جائیں تاکہ حقائق سامنے آ سکیں۔
ابھجیت دیپکے نے دعویٰ کیا کہ ان کے والدین کو بھی مبینہ طور پر دھمکی آمیز پیغامات موصول ہوئے، جبکہ انہوں نے طلبہ کے احتجاج، امتحانی بے ضابطگیوں اور بعض حکومتی پالیسیوں پر بھی تنقید کی۔
پریس کانفرنس کے دوران انہوں نے بابا رام دیو کے حالیہ بیان پر بھی ردعمل دیتے ہوئے کہا کہ اگر تعلیم، جمہوریت اور طلبہ کے حقوق کے لیے آواز اٹھانا جرم ہے تو وہ اپنی جدوجہد جاری رکھیں گے۔ انہوں نے بابا رام دیو کو مخاطب کرتے ہوئے کہا کہ انہیں دوسروں کے بجائے اپنے معاملات پر توجہ دینی چاہیے۔
واضح رہے کہ یہ تمام الزامات ابھجیت دیپکے کی جانب سے پریس کانفرنس میں عائد کیے گئے ہیں۔ خبر لکھے جانے تک بھارتیہ جنتا پارٹی یا متعلقہ حکام کی جانب سے ان دعوؤں پر کوئی باضابطہ ردعمل سامنے نہیں آیا ہے۔
مزید پڑھیں:ویوو کا نیا X300E لانچ، Snapdragon 8 Gen 5 کے ساتھ بڑی بیٹری بھی شامل
