اسلام آباد: سعودی عرب میں ملازمتیں حاصل کرنے کے خواہشمند پاکستانیوں کے لیے اہم خبر سامنے آئی ہے۔ سعودی عرب کے وژن 2030 کے تحت مختلف شعبوں میں مہارت رکھنے والے افراد کے لیے مستقبل میں ہزاروں روزگار کے مواقع پیدا ہونے کی توقع ہے، جبکہ ماہر افرادی قوت کی طلب میں بھی نمایاں اضافہ متوقع ہے۔
سعودی وژن 2030 کا مقصد معیشت کو مزید متنوع اور جدید بنانا، تیل پر انحصار کم کرنا اور مختلف صنعتی و تکنیکی شعبوں کو فروغ دینا ہے۔ اسی حکمت عملی کے تحت “سعودائزیشن” پالیسی پر بھی عمل جاری ہے، جس کے ذریعے مقامی شہریوں کو روزگار کے زیادہ مواقع فراہم کیے جا رہے ہیں۔
تاہم ماہرین کا کہنا ہے کہ اس پالیسی کا مطلب غیر ملکی کارکنوں کے لیے دروازے بند ہونا نہیں، بلکہ اب ایسے افراد کو ترجیح دی جائے گی جو جدید مہارت، تکنیکی تعلیم اور پیشہ ورانہ تجربہ رکھتے ہوں۔
رپورٹس کے مطابق مستقبل میں سعودی عرب میں ملازمتیں درج ذیل شعبوں میں زیادہ دستیاب ہونے کا امکان ہے:
اہم شعبے
کان کنی اور معدنیات
قابلِ تجدید توانائی (سولر اور ونڈ انرجی)
ڈیجیٹل انفراسٹرکچر
لاجسٹکس اور ٹرانسپورٹ
اسپیشلائزڈ ہیلتھ کیئر
دفاعی مینوفیکچرنگ
سیاحت اور ثقافتی ورثہ
تفریح اور کھیل
ماہرین کے مطابق ان شعبوں میں بین الاقوامی معیار کی تربیت، جدید ٹیکنالوجی، مصنوعی ذہانت، کلاؤڈ کمپیوٹنگ، انجینئرنگ، صحت اور انفارمیشن ٹیکنالوجی سے وابستہ مہارتیں رکھنے والے افراد کے لیے روزگار کے امکانات مزید روشن ہوں گے۔
بیورو آف ایمیگریشن اینڈ اوورسیز ایمپلائمنٹ نے بھی بیرونِ ملک ملازمت کے خواہشمند افراد کو مشورہ دیا ہے کہ وہ اپنی پیشہ ورانہ صلاحیتوں کو جدید تقاضوں کے مطابق بہتر بنائیں تاکہ سعودی عرب سمیت دیگر ممالک میں دستیاب روزگار کے مواقع سے بھرپور فائدہ اٹھایا جا سکے۔
