ممبئی: راشمیکا مندانا زخمی ہونے کی خبر نے ان کے مداحوں کو تشویش میں مبتلا کر دیا ہے۔ بھارتی میڈیا کے مطابق معروف اداکارہ ایک نئی فلم کی شوٹنگ کے دوران پیش آنے والے حادثے میں شدید زخمی ہوگئیں، جس کے بعد ڈاکٹروں نے انہیں فوری طور پر تمام مصروفیات ترک کرنے کی ہدایت دی ہے۔
رپورٹس کے مطابق راشمیکا مندانا ایک فلم کے مشکل ڈانس اور ایکشن مناظر کی عکس بندی کر رہی تھیں کہ اسی دوران انہیں کولہے (ہِپ) پر شدید چوٹ لگ گئی۔ بتایا جا رہا ہے کہ مسلسل شوٹنگ، طویل اوقاتِ کار اور جسمانی طور پر تھکا دینے والی پرفارمنس کے باعث ان پر پہلے ہی کافی دباؤ موجود تھا۔
طبی معائنے کے بعد معلوم ہوا کہ اداکارہ کے کولہے کے پٹھے کا جوڑ شدید متاثر ہوا ہے اور پٹھا اپنی جگہ سے الگ ہو گیا، جسے ماہرین ایک سنگین چوٹ قرار دے رہے ہیں۔ اس نوعیت کی انجری سے مکمل صحت یابی کے لیے مناسب آرام اور مرحلہ وار بحالی ناگزیر سمجھی جاتی ہے۔
ڈاکٹروں نے راشمیکا مندانا کو آئندہ چھ ہفتوں تک مکمل آرام کرنے اور ہر قسم کی سخت جسمانی سرگرمی سے گریز کرنے کی ہدایت کی ہے۔ ابتدائی صحت یابی کے بعد ان کی فزیوتھراپی اور ری ہیبیلیٹیشن کا باقاعدہ آغاز کیا جائے گا تاکہ کولہے کی حرکت، طاقت اور لچک کو بحال کیا جا سکے۔
طبی ماہرین کے مطابق اداکارہ کی مکمل جانچ کے بعد ہی انہیں دوبارہ فلموں کی شوٹنگ کی اجازت دی جائے گی۔ اس دوران ان کے متعدد فلمی منصوبوں اور پروموشنل سرگرمیوں کے شیڈول میں بھی تبدیلی متوقع ہے۔
واضح رہے کہ راشمیکا مندانا اس وقت بھارتی فلم انڈسٹری کی مصروف ترین اداکاراؤں میں شمار ہوتی ہیں۔ وہ بیک وقت کئی بڑے فلمی منصوبوں پر کام کر رہی تھیں، جبکہ مختلف قومی اور بین الاقوامی برانڈز کی سفیر ہونے کے باعث مسلسل سفر اور تشہیری مہمات میں بھی شریک رہتی ہیں۔
مداحوں نے سوشل میڈیا پر اداکارہ کی جلد صحت یابی کے لیے نیک تمناؤں کا اظہار کیا ہے اور امید ظاہر کی ہے کہ وہ جلد مکمل صحت یاب ہو کر دوبارہ فلمی سرگرمیوں میں حصہ لیں گی۔
