اسلام آباد مقامی ٹیکس سے متعلق حکومت نے اہم تجاویز تیار کرلی ہیں، جن کا مقصد دارالحکومت کو خودمختار یونٹ بنانے کے عمل کے دوران مقامی سطح پر اضافی آمدن پیدا کرنا ہے۔ مجوزہ ٹیکس سے حاصل ہونے والی رقم اسلام آباد کی حدود میں بنیادی سہولیات اور انتظامی امور پر خرچ کیے جانے کی تجویز ہے۔
ذرائع وزارت خزانہ کے مطابق اسلام آباد کے لیے مقامی سطح پر ٹیکس عائد کرنے کی تجویز کا مقصد شہر میں ہسپتالوں، تعلیمی اداروں، فلاحی منصوبوں اور دیگر انتظامی ضروریات کے لیے مالی وسائل پیدا کرنا ہے۔ حکومت کی جانب سے بنیادی ڈھانچے کو بہتر بنانے اور انتظامی نظام کے اخراجات پورے کرنے کے لیے مالی گنجائش پیدا کرنے پر غور کیا جا رہا ہے۔
ذرائع کے مطابق مجوزہ ٹیکس سے کتنی رقم حاصل ہوسکتی ہے، اس کا حتمی تخمینہ ابھی تیار نہیں کیا گیا۔ اس حوالے سے ایک باقاعدہ طریقہ کار بھی تجویز کیا گیا ہے، جس کے تحت ٹیکس سے متعلق تجاویز پہلے قائم ذیلی کمیٹی کے سامنے پیش کی جائیں گی۔
ذیلی کمیٹی سے منظوری ملنے کے بعد تجاویز وزیر منصوبہ بندی کی زیر صدارت قائم کمیٹی کو بھیجی جائیں گی۔ وہاں سے منظوری کی صورت میں انہیں حتمی توثیق کے لیے وزیراعظم شہباز شریف کے سامنے پیش کیا جائے گا۔
حکومت اور آئی ایم ایف کے درمیان رواں ماہ ہونے والے اقتصادی جائزہ مذاکرات میں بھی مجوزہ ٹیکس پر بات چیت متوقع ہے۔ ذرائع کا کہنا ہے کہ آئی ایم ایف کی منظوری کے بعد ہی اس معاملے پر حتمی فیصلہ کیا جائے گا۔
تجاویز کے مطابق حکومت آئندہ مالی سال کے بجٹ میں اسلام آباد کے لیے اس مقامی ٹیکس کو متعارف کرانے کا ارادہ رکھتی ہے۔ تاہم ٹیکس کی نوعیت، شرح اور اس سے حاصل ہونے والی ممکنہ آمدن سمیت دیگر تفصیلات حتمی منظوری کے بعد سامنے آنے کا امکان ہے۔
